Á Erpsstöðum er leigt út eitt 82fm. hús. Húsið var  byggt árið 1961 og endurnýjað 2004 og hefur verið leigt út frá þeim tíma til ferðamanna.  Húsið er leigt út allt í einu og hentar vel fyrir fjölskyldur eða litla vinahópa. Ekki er boðið uppá morgunmat né aðra málsverði.

Það fer vel um 6 fullorðna í húsinu og fleiri ef börn eru með í för. Það eru þrjú svefnherbergi í húsinu, þar af eitt með hjónarúmi og þá tvö með tveimur einsmanns rúmum. Tvö af rúmunum eru með útdraganlegum beddum sem henta yngri börnum. Barnarimlarúm er í húsinu og aukadýnur.  

Rúmgott baðherbergi með sturtu og þvottavél er í húsinu ásamt ágætis eldhúsi með öllum nauðsynlegum nútíma tækjum. Það er 50 fm. verönd við húsið, með borði, bekk, gasgrilli og heitum potti. 

Húsið er staðsett uppi í hlíð um 500 m. frá íbúðarhúsi og gripahúsum ábúðenda.  Því er gott næði og lítil umferð við húsið og gott  útsýni yfir Hvammsfjörðinn. 

Það eru 16 km. í næstu verslun og veitingastað í Búðardal.  Gönguleiðir um umhverfi staðarins eru skemmtilegar. Hægt að feta upp á Sauðafellið, sem bærinn stendur við eða labba niður með Miðánni sem liðast um dalinn.  

Á Erpsstöðum býr 7 manna fjölskylda  með 70 mjólkurkýr auk um 130 annarra nautgripa.  Á bænum eru einnig hestar og kindur  auk smádýra; hænsna, kanína og naggrísa. Gestum er velkomið að kynna sér búskapinn; labba um fjósið og fylgjast með mjöltum ( sem mjaltarobot framkvæmir). 

Vaxandi heimavinnsla (Rjómabúið)  hóf starfssemi sumarið 2009 með  rjómaís sem seldur er í  lítilli móttöku í fjósinu.  Framleiðslan hefur undið uppá sig og núna er framleitt skyr, rjómi, ostur og skyrkonfekt. Móttakan í fjósinu eru opin 1. júní - 15 sept frá kl 13-17.

 Þetta er skemmtileg gisting fyrir barnafjölskyldur og það að komast í návígi við húsdýr er  bónus fyrir börnin.

Erpsstaðir standa við Vestfjarðaveg nr.60 um 25 km frá þjóðvegi nr.1

Verðskrá vetur jan-maí og sept-des
 1 nótt kr 14000,-
 1000,- leiga á sængurfötum og handklæði pr mann
 5000,- þrif á húsinu ef óskað er eftir því. Húsinu skal skilað hreinu eins og við því er tekið.

Tilboð ef gestir dvelja 4 nætur eða lengur er verð pr nótt 10000,-

Verðskrá sumar júní-ágúst
 1 nótt 16000,-
 1000,- leiga á sængurfötum og handklæði pr mann
 5000,- þrif á húsinu ef óskað er eftir því. Húsinu skal skilað hreinu eins og við því er tekið.